Tehillim/Psalm 105
בספר דברי הימים (א' טז, ז) כתוב שכשהעלה דוד את הארון מבית עובד אדום לירושלים, שנתן זה המזמור לאסף ולאחיו לשורר לפני הארון. והמזמור נאמר הודאה לאל על כל הטובות שגמלנו, והוא ציווה לזמרו באותה שעה, להודיע הנסים שנעשו על עניין הארון בפלשתים (ראה שמואל א' ה).
הוֹד֣וּ לַ֭יהוה קִרְא֣וּ בִּשְׁמ֑וֹ הוֹדִ֥יעוּ בָ֝עַמִּ֗ים עֲלִילוֹתָֽיו׃
שִֽׁירוּ־ל֭וֹ זַמֺּרוּ־ל֑וֹ שִׂ֝֗יחוּ בֺּכׇל־נִפֺלֺאוֹתָֽיו׃
הִֽ֭תְהַלֺלוּ בֺּשֵׁ֣ם קׇדְשׁ֑וֹ יִ֝שְׂמַ֗ח לֵ֤ב ׀ מֺבַקְשֵׁ֬י יהוֽה׃
דִּרְשׁ֣וּ יהו֣ה וֺעֻזּ֑וֹ בַּקֺּשׁ֖וּ פָנָ֣יו תָּמִֽיד׃
זִכְר֗וּ נִפֺלֺאוֹתָ֥יו אֲשֶׁר־עָשָׂ֑ה מֹ֝פֺתָ֗יו וּמִשְׁפֺּטֵי־פִֽיו׃
זֶ֭רַע אַבְרָהָ֣ם עַבְדּ֑וֹ בֺּנֵ֖י יַעֲקֹ֣ב בֺּחִירָֽיו׃
ה֭וּא יהו֣ה אֱלֹהֵ֑ינוּ בֺּכׇל־הָ֝אָ֗רֶץ מִשְׁפָּטָֽיו׃
זָכַ֣ר לֺעוֹלָ֣ם בֺּרִית֑וֹ דָּבָ֥ר צִ֝וָּ֗ה לֺאֶ֣לֶף דּֽוֹר׃
אֲשֶׁ֣ר כָּ֭רַת אֶת־אַבְרָהָ֑ם וּשְׁב֖וּעָת֣וֹ לֺיִשְׂחָֽק׃
וַיַּֽעֲמִידֶ֣הָ לֺיַעֲקֹ֣ב לֺחֹ֑ק לֺ֝יִשְׂרָאֵ֗ל בֺּרִ֣ית עוֹלָֽם׃
לֵאמֹ֗ר לֺךָ֗ אֶתֵּ֥ן אֶת־אֶֽרֶץ־כֺּנָ֑עַן חֶ֝֗בֶל נַחֲלַתְכֶֽם׃
בִּֽ֭הְיוֹתָם מֺתֵ֣י מִסְפָּ֑ר כִּ֝מְעַ֗ט וֺגָרִ֥ים בָּֽהּ׃
וַֽ֭יִּתְהַלֺּכוּ מִגּ֣וֹי אֶל־גּ֑וֹי מִ֝מַּמְלָכָ֗ה אֶל־עַ֥ם אַחֵֽר׃
לֹֽא־הִנִּ֣יחַ אָדָ֣ם לֺעׇשְׁקָ֑ם וַיּ֖וֹכַח עֲלֵיהֶ֣ם מֺלָכִֽים׃
אַֽל־תִּגֺּע֥וּ בִמְשִׁיחָ֑י וֺ֝לִנְבִיאַי אַל־תָּרֵֽעוּ׃
וַיִּקְרָ֣א רָ֭עָב עַל־הָאָ֑רֶץ כׇּֽל־מַטֵּה־לֶ֥חֶם שָׁבָֽר׃
שָׁלַ֣ח לִפְנֵיהֶ֣ם אִ֑ישׁ לֺ֝עֶ֗בֶד נִמְכַּ֥ר יוֹסֵֽף׃
עִנּ֣וּ בַכֶּ֣בֶל רַגְל֑וֹ בַּ֝רְזֶ֗ל בָּ֣אָה נַפְשֽׁוֹ׃
עַד־עֵ֥ת בֹּֽא־דֺבָר֑וֹ אִמְרַ֖ת יהו֣ה צֺרָפָֽתֺהוּ׃
שָׁ֣לַח מֶ֭לֶךְ וַיַּתִּירֵ֑הוּ מֹשֵׁ֥ל עַ֝מִּ֗ים וַֽיְפַתֺּחֵֽהוּ׃
שָׂמ֣וֹ אָד֣וֹן לֺבֵית֑וֹ וּ֝מֹשֵׁ֗ל בֺּכׇל־קִנְיָנֽוֹ׃
לֶאְסֹ֣ר שָׂרָ֣יו בֺּנַפְשׁ֑וֹ וּזְקֵנָ֥יו יֺחַכֵּֽם׃
וַיָּבֹ֣א יִשְׂרָאֵ֣ל מִצְרָ֑יִם וֺ֝יַעֲקֹ֗ב גָּ֣ר בֺּאֶֽרֶץ־חָֽם׃
וַיֶּ֣פֶר אֶת־עַמּ֣וֹ מֺאֹ֑ד וַ֝יַּֽעֲצִמֵהוּ מִצָּרָֽיו׃
הָפַ֣ךְ לִ֭בָּם לִשְׂנֹ֣א עַמּ֑וֹ לֺ֝הִתְנַכֵּ֗ל בַּעֲבָדָֽיו׃
שָׁ֭לַח מֹשֶׁ֣ה עַבְדּ֑וֹ אַ֝הֲרֹ֗ן אֲשֶׁ֣ר בָּֽחַר־בּֽוֹ׃
שָֽׂמוּ־בָ֭ם דִּבְרֵ֣י אֹתוֹתָ֑יו וּ֝מֹפֺתִ֗ים בֺּאֶ֣רֶץ חָֽם׃
שָׁ֣לַֽח חֹ֭שֶׁךְ וַיַּחְשִׁ֑ךְ וֺלֹֽא־מָ֝ר֗וּ אֶת־דֺּבָרֽוֹ׃
הָפַ֣ךְ אֶת־מֵימֵיהֶ֣ם לֺדָ֑ם וַ֝יָּ֗מֶת אֶת־דֺּגָתָֽם׃
שָׁרַ֣ץ אַרְצָ֣ם צֺפַרְדֺּעִ֑ים בֺּ֝חַדְרֵ֗י מַלְכֵיהֶֽם׃
אָ֭מַר וַיָּבֹ֣א עָרֹ֑ב כִּ֝נִּ֗ים בֺּכׇל־גֺּבוּלָֽם׃
נָתַ֣ן גִּשְׁמֵיהֶ֣ם בָּרָ֑ד אֵ֖שׁ לֶהָב֣וֹת בֺּאַרְצָֽם׃
וַיַּ֣ךְ גַּ֭פְנָם וּתֺאֵנָתָ֑ם וַ֝יְשַׁבֵּ֗ר עֵ֣ץ גֺּבוּלָֽם׃
אָ֭מַר וַיָּבֹ֣א אַרְבֶּ֑ה וֺ֝יֶ֗לֶק וֺאֵ֣ין מִסְפָּֽר׃
וַיֹּ֣אכַל כׇּל־עֵ֣שֶׂב בֺּאַרְצָ֑ם וַ֝יֹּ֗אכַל פֺּרִ֣י אַדְמָתָֽם׃
וַיַּ֣ךְ כׇּל־בֺּכ֣וֹר בֺּאַרְצָ֑ם רֵ֝אשִׁ֗ית לֺכׇל־אוֹנָֽם׃
וַֽ֭יּוֹצִיאֵם בֺּכֶ֣סֶף וֺזָהָ֑ב וֺאֵ֖ין בִּשְׁבָטָ֣יו כּוֹשֵֽׁל׃
שָׂמַ֣ח מִצְרַ֣יִם בֺּצֵאתָ֑ם כִּֽי־נָפַ֖ל פַּחְדָּ֣ם עֲלֵיהֶֽם׃
פָּרַ֣שׂ עָנָ֣ן לֺמָסָ֑ךְ וֺ֝אֵ֗שׁ לֺהָאִ֥יר לָֽיְלָה׃
שָׁאַ֣ל וַיָּבֵ֣א שֺׂלָ֑ו וֺלֶ֥חֶם שָׁ֝מַ֗יִם יַשְׂבִּיעֵֽם׃
פָּ֣תַח צ֭וּר וַיָּז֣וּבוּ מָ֑יִם הָ֝לֺכ֗וּ בַּצִּיּ֥וֹת נָהָֽר׃
כִּֽי־זָ֭כַר אֶת־דֺּבַ֣ר קׇדְשׁ֑וֹ אֶֽת־אַבְרָהָ֥ם עַבְדּֽוֹ׃
וַיּוֹצִ֣א עַמּ֣וֹ בֺשָׂשׂ֑וֹן בֺּ֝רִנָּ֗ה אֶת־בֺּחִירָֽיו׃
וַיִּתֵּ֣ן לָ֭הֶם אַרְצ֣וֹת גּוֹיִ֑ם וַעֲמַ֖ל לֺאֻמִּ֣ים יִירָֽשׁוּ׃
בַּעֲב֤וּר ׀ יִשְׁמֺר֣וּ חֻ֭קָּיו וֺתוֹרֹתָ֥יו יִנְצֹ֗רוּ הַֽלֺלוּיָֽהּ׃
More Tehillim on this site: The Book of Tehillim – All 150 Psalms · Daily Tehillim · Communal Tehillim