Tehillim/Psalm 86

זה המזמור דרשוהו רבותינו (ראה שוחר טוב פו, ב) על הגלות גם כן, אלא שהנראה שהוא נאמר על הזמן שהיה נרדף מפני שאול ומתפלל בהצלחתו.

תֺּפִלָּ֗ה לֺדָ֫וִ֥ד הַטֵּֽה־יהו֣ה אׇזֺנְךָ֣ עֲנֵ֑נִי כִּֽי־עָנִ֖י וֺאֶבְי֣וֹן אָֽנִי׃

שׇֽׁמֺרָ֣ה נַפְשִׁי֮ כִּֽי־חָסִ֪יד אָ֥נִי הוֹשַׁ֣ע עַ֭בְדֺּךָ אַתָּ֣ה אֱלֹהַ֑י הַבּוֹטֵ֥חַ אֵלֶֽיךָ׃

חׇנֵּ֥נִי אֲדֹנָ֑י כִּ֥י־אֵלֶ֥יךָ אֶ֝קְרָ֗א כׇּל־הַיּֽוֹם׃

שַׂ֭מֵּחַ נֶ֣פֶשׁ עַבְדֶּ֑ךָ כִּ֥י־אֵלֶ֥יךָ אֲ֝דֹנָ֗י נַפְשִׁ֥י אֶשָּֽׂא׃

כִּֽי־אַתָּ֣ה אֲ֭דֹנָי ט֣וֹב וֺסַלָּ֑ח וֺרַב־חֶ֝֗סֶד לֺכׇל־קֹרֺאֶֽיךָ׃

הַאֲזִ֣ינָה י֭הוה תֺּפִלָּתִ֑י וֺ֝הַקְשִׁ֗יבָה בֺּק֣וֹל תַּחֲנוּנוֹתָֽי׃

בֺּי֣וֹם צָ֭רָתִ֥י אֶקְרָאֶ֗ךָּ כִּ֣י תַעֲנֵֽנִי׃

אֵין־כָּמ֖וֹךָ בָאֱלֹהִ֥ים ׀ אֲדֹנָ֗י וֺאֵ֣ין כֺּֽמַעֲשֶֽׂיךָ׃

כׇּל־גּוֹיִ֤ם ׀ אֲשֶׁ֥ר עָשִׂ֗יתָ יָב֤וֹאוּ ׀ וֺיִשְׁתַּחֲו֣וּ לֺפָנֶ֣יךָ אֲדֹנָ֑י וִֽיכַבֺּד֣וּ לִשְׁמֶֽךָ׃

כִּֽי־גָד֣וֹל אַ֭תָּה וֺעֹשֵׂ֣ה נִפְלָא֑וֹת אַתָּ֖ה אֱלֹהִ֣ים לֺבַדֶּֽךָ׃

ה֘וֹרֵ֤נִי יהו֨ה ׀ דַּרְכֶּ֗ךָ אֲהַלֵּ֥ךְ בַּאֲמִתֶּ֑ךָ יַחֵ֥ד לֺ֝בָבִ֗י לֺיִרְאָ֥ה שֺׁמֶֽךָ׃

אוֹדֺךָ֤ ׀ אֲדֹנָ֣י אֱ֭לֹהַי בֺּכׇל־לֺבָבִ֑י וַאֲכַבֺּדָ֖ה שִׁמְךָ֣ לֺעוֹלָֽם׃

כִּֽי־חַ֭סְדֺּךָ גָּד֣וֹל עָלָ֑י וֺהִצַּ֥לְתָּ נַ֝פְשִׁ֗י מִשֺּׁא֥וֹל תַּחְתִּיָּֽה׃

אֱלֹהִ֤ים ׀ זֵ֘דִ֤ים קָֽמוּ־עָלַ֗י וַעֲדַ֣ת עָ֭רִיצִים בִּקְשׁ֣וּ נַפְשִׁ֑י וֺלֹ֖א שָׂמ֣וּךָ לֺנֶגְדָּֽם׃

וֺאַתָּ֣ה אֲ֭דֹנָי אֵל־רַח֣וּם וֺחַנּ֑וּן אֶ֥רֶךְ אַ֝פַּ֗יִם וֺרַב־חֶ֥סֶד וֶאֱמֶֽת׃

פֺּנֵ֥ה אֵלַ֗י וֺחׇ֫נֵּ֥נִי תֺּנָֽה־עֻזֺּךָ֥ לֺעַבְדֶּ֑ךָ וֺ֝הוֹשִׁ֗יעָה לֺבֶן־אֲמָתֶֽךָ׃

עֲשֵֽׂה־עִמִּ֥י א֗וֹת לֺט֫וֹבָ֥ה וֺיִרְא֣וּ שֹׂנֺאַ֣י וֺיֵבֹ֑שׁוּ כִּֽי־אַתָּ֥ה י֝הו֗ה עֲזַרְתַּ֥נִי וֺנִחַמְתָּֽנִי׃