תהלים פרק קו
גם זה המזמור הודאה על הנסים שעשה לנו האל יתעלה. ומתפלל לפניו, שיזכרהו ויזכהו לראות בטובת בחיריו לעולם הבא, ומתוודה על חטאיו. וזכר ומאריך בסיפור עוונות האבות, מפני שבזכירתם הערה בתשובה, שאנו מתבוננים שהכול קרה להם בחטאם ובתשובתם היה מרחם אותם ומצילם מתוקף הצרות, כמו שכתוב בסוף זה המזמור (להלן, מג-מו).
הַֽלֺלוּיָ֨הּ ׀ הוֹד֣וּ לַיהו֣ה כִּי־ט֑וֹב כִּ֖י לֺעוֹלָ֣ם חַסְדּֽוֹ׃
מִ֗י יֺ֭מַלֵּל גֺּבוּר֣וֹת יהו֑ה יַ֝שְׁמִ֗יעַ כׇּל־תֺּהִלָּתֽוֹ׃
אַ֭שְׁרֵי שֹׁמֺרֵ֣י מִשְׁפָּ֑ט עֹשֵׂ֖ה צֺדָקָ֣ה בֺכׇל־עֵֽת׃
זׇכְרֵ֣נִי י֭הוה בִּרְצ֣וֹן עַמֶּ֑ךָ פׇּ֝קְדֵ֗נִי בִּישׁוּעָתֶֽךָ׃
לִרְא֤וֹת ׀ בֺּט֘וֹבַ֤ת בֺּחִירֶ֗יךָ לִ֭שְׂמֹחַ בֺּשִׂמְחַ֣ת גּוֹיֶ֑ךָ לֺ֝הִתְהַלֵּ֗ל עִם־נַחֲלָתֶֽךָ׃
חָטָ֥אנוּ עִם־אֲבֹתֵ֗ינוּ הֶעֱוִ֥ינוּ הִרְשָֽׁעְנוּ׃
אֲב֘וֹתֵ֤ינוּ בֺמִצְרַ֨יִם ׀ לֹא־הִשְׂכִּ֬ילוּ נִפְלֺאוֹתֶ֗יךָ לֹ֣א זָ֭כֺרוּ אֶת־רֹ֣ב חֲסָדֶ֑יךָ וַיַּמְר֖וּ עַל־יָ֣ם בֺּיַם־סֽוּף׃
וַֽ֭יּוֹשִׁיעֵם לֺמַ֣עַן שֺׁמ֑וֹ לֺ֝הוֹדִ֗יעַ אֶת־גֺּבוּרָתֽוֹ׃
וַיִּגְעַ֣ר בֺּיַם־ס֭וּף וַֽיֶּחֱרָ֑ב וַיּוֹלִיכֵ֥ם בַּ֝תֺּהֹמ֗וֹת כַּמִּדְבָּֽר׃
וַֽ֭יּוֹשִׁיעֵם מִיַּ֣ד שׂוֹנֵ֑א וַ֝יִּגְאָלֵ֗ם מִיַּ֥ד אוֹיֵֽב׃
וַיְכַסּוּ־מַ֥יִם צָרֵיהֶ֑ם אֶחָ֥ד מֵ֝הֶ֗ם לֹ֣א נוֹתָֽר׃
וַיַּאֲמִ֥ינוּ בִדְבָרָ֑יו יָ֝שִׁ֗ירוּ תֺּהִלָּתֽוֹ׃
מִֽ֭הֲרוּ שָׁכֺח֣וּ מַעֲשָׂ֑יו לֹֽא־חִ֝כּ֗וּ לַעֲצָתֽוֹ׃
וַיִּתְאַוּ֣וּ תַ֭אֲוָה בַּמִּדְבָּ֑ר וַיְנַסּוּ־אֵ֝֗ל בִּֽישִׁימֽוֹן׃
וַיִּתֵּ֣ן לָ֭הֶם שֶׁאֱלָתָ֑ם וַיְשַׁלַּ֖ח רָז֣וֹן בֺּנַפְשָֽׁם׃
וַיְקַנְא֣וּ לֺ֭מֹשֶׁה בַּֽמַּחֲנֶ֑ה לֺ֝אַהֲרֹ֗ן קֺד֣וֹשׁ יהוֽה׃
תִּפְתַּח־אֶ֭רֶץ וַתִּבְלַ֣ע דָּתָ֑ן וַ֝תֺּכַ֗ס עַל־עֲדַ֥ת אֲבִירָֽם׃
וַתִּבְעַר־אֵ֥שׁ בַּעֲדָתָ֑ם לֶ֝הָבָ֗ה תֺּלַהֵ֥ט רֺשָׁעִֽים׃
יַעֲשׂוּ־עֵ֥גֶל בֺּחֹרֵ֑ב וַ֝יִּשְׁתַּחֲו֗וּ לֺמַסֵּכָֽה׃
וַיָּמִ֥ירוּ אֶת־כֺּבוֹדָ֑ם בֺּתַבְנִ֥ית שׁ֝֗וֹר אֹכֵ֥ל עֵֽשֶׂב׃
שָׁ֭כֺחוּ אֵ֣ל מוֹשִׁיעָ֑ם עֹשֶׂ֖ה גֺדֹל֣וֹת בֺּמִצְרָֽיִם׃
נִ֭פְלָאוֹת בֺּאֶ֣רֶץ חָ֑ם נ֝וֹרָא֗וֹת עַל־יַם־סֽוּף׃
וַיֹּ֗אמֶר לֺֽהַשְׁמִ֫ידָ֥ם לוּלֵ֡י מֹ֘שֶׁ֤ה בֺחִיר֗וֹ עָמַ֣ד בַּפֶּ֣רֶץ לֺפָנָ֑יו לֺהָשִׁ֥יב חֲ֝מָת֗וֹ מֵֽהַשְׁחִֽית׃
וַֽ֭יִּמְאֲסוּ בֺּאֶ֣רֶץ חֶמְדָּ֑ה לֹֽא־הֶ֝אֱמִ֗ינוּ לִדְבָרֽוֹ׃
וַיֵּרָגֺנ֥וּ בֺאׇהֳלֵיהֶ֑ם לֹ֥א שָׁ֝מֺע֗וּ בֺּק֣וֹל יהוֽה׃
וַיִּשָּׂ֣א יָד֣וֹ לָהֶ֑ם לֺהַפִּ֥יל א֝וֹתָ֗ם בַּמִּדְבָּֽר׃
וּלְהַפִּ֣יל זַ֭רְעָם בַּגּוֹיִ֑ם וּ֝לְזָרוֹתָ֗ם בָּאֲרָצֽוֹת׃
וַ֭יִּצָּ֣מֺדוּ לֺבַ֣עַל פֺּע֑וֹר וַ֝יֹּאכֺל֗וּ זִבְחֵ֥י מֵתִֽים׃
וַ֭יַּכְעִיסוּ בֺּמַֽעַלֺלֵיהֶ֑ם וַתִּפְרׇץ־בָּ֝֗ם מַגֵּפָֽה׃
וַיַּעֲמֹ֣ד פִּֽ֭ינֺחָס וַיְפַלֵּ֑ל וַ֝תֵּעָצַ֗ר הַמַּגֵּפָֽה׃
וַתֵּחָ֣שֶׁב ל֭וֹ לִצְדָקָ֑ה לֺדֹ֥ר וָ֝דֹ֗ר עַד־עוֹלָֽם׃
וַ֭יַּקְצִיפוּ עַל־מֵ֥י מֺרִיבָ֑ה וַיֵּ֥רַע לֺ֝מֹשֶׁ֗ה בַּעֲבוּרָֽם׃
כִּֽי־הִמְר֥וּ אֶת־רוּח֑וֹ וַ֝יְבַטֵּ֗א בִּשְׂפָתָֽיו׃
לֹֽא־הִ֭שְׁמִידוּ אֶת־הָֽעַמִּ֑ים אֲשֶׁ֤ר אָמַ֖ר יהו֣ה לָהֶֽם׃
וַיִּתְעָרֺב֥וּ בַגּוֹיִ֑ם וַֽ֝יִּלְמֺד֗וּ מַֽעֲשֵׂיהֶֽם׃
וַיַּעַבְד֥וּ אֶת־עֲצַבֵּיהֶ֑ם וַיִּהְי֖וּ לָהֶ֣ם לֺמוֹקֵֽשׁ׃
וַיִּזְבֺּח֣וּ אֶת־בֺּ֭נֵיהֶם וֺאֶת־בֺּנֽוֹתֵיהֶ֗ם לַשֵּֽׁדִים׃
וַיִּֽשְׁפֺּכ֨וּ דָ֪ם נָקִ֡י דַּם־בֺּנֵ֘יהֶ֤ם וּֽבְנוֹתֵיהֶ֗ם אֲשֶׁ֣ר זִ֭בֺּחוּ לַעֲצַבֵּ֣י כֺנָ֑עַן וַתֶּחֱנַ֥ף הָ֝אָ֗רֶץ בַּדָּמִֽים׃
וַיִּטְמֺא֥וּ בֺמַעֲשֵׂיהֶ֑ם וַ֝יִּזְנוּ֗ בֺּמַֽעַלֺלֵיהֶֽם׃
וַיִּֽחַר־אַ֣ף יהו֣ה בֺּעַמּ֑וֹ וַ֝יְתָעֵ֗ב אֶת־נַחֲלָתֽוֹ׃
וַיִּתֺּנֵ֥ם בֺּיַד־גּוֹיִ֑ם וַֽיִּמְשֺׁל֥וּ בָ֝הֶ֗ם שֹׂנֺאֵיהֶֽם׃
וַיִּלְחָצ֥וּם אוֹיֺבֵיהֶ֑ם וַ֝יִּכָּנֺע֗וּ תַּ֣חַת יָדָֽם׃
פֺּעָמִ֥ים רַבּ֗וֹת יַצִּ֫ילֵ֥ם וֺ֭הֵמָּה יַמְר֣וּ בַעֲצָתָ֑ם וַ֝יָּמֹ֗כּוּ בַּעֲוֹנָֽם׃
וַ֭יַּרְא בַּצַּ֣ר לָהֶ֑ם בֺּ֝שׇׁמְע֗וֹ אֶת־רִנָּתָֽם׃
וַיִּזְכֹּ֣ר לָהֶ֣ם בֺּרִית֑וֹ וַ֝יִּנָּחֵ֗ם כֺּרֹ֣ב חֲסָדָֽיו׃
וַיִּתֵּ֣ן אוֹתָ֣ם לֺרַחֲמִ֑ים לִ֝פְנֵ֗י כׇּל־שׁוֹבֵיהֶֽם׃
הוֹשִׁיעֵ֨נוּ ׀ יה֘ו֤ה אֱלֹהֵ֗ינוּ וֺקַבֺּצֵנוּ֮ מִֽן־הַגּ֫וֹיִ֥ם לֺ֭הוֹדוֹת לֺשֵׁ֣ם קׇדֺשֶׁ֑ךָ לֺ֝הִשְׁתַּבֵּ֗חַ בִּתְהִלָּתֶֽךָ׃
בָּר֤וּךְ־יהו֨ה אֱלֹהֵ֪י יִשְׂרָאֵ֡ל מִן־הָ֤עוֹלָ֨ם ׀ וֺעַ֬ד הָעוֹלָ֗ם וֺאָמַ֖ר כׇּל־הָעָ֥ם אָמֵ֗ן הַֽלֺלוּיָֽהּ׃
עוד תהלים באתר: ספר תהלים כל הפרקים · תהלים יומי · תהלים בציבור