Tehillim/Psalm 9

רוב מפרשים מסכימים שאמרוֹ על גָָּלית, ו"לַבֵּן" כמו 'הבן', רוצה לומר: האמצעי, והוא, שגָָּלית זה קראוֹ הכתוב "איש הבֵּנַיׅם" (שמואל א' יז, ד).

לַ֭מְנַצֵּחַ עַל־מ֥וּת לַבֵּ֗ן מִזְמ֥וֹר לֺדָוִֽד׃

אוֹדֶ֣ה י֭הוה בֺּכׇל־לִבִּ֑י אֲ֝סַפֺּרָ֗ה כׇּל־נִפֺלֺאוֹתֶֽיךָ׃

אֶשְׂמֺחָ֣ה וֺאֶעֶלְצָ֣ה בָ֑ךְ אֲזַמֺּרָ֖ה שִׁמְךָ֣ עֶלְיֽוֹן׃

בֺּשׁוּב־אוֹיֺבַ֥י אָח֑וֹר יִכָּשֺׁל֥וּ וֺ֝יֹאבֺד֗וּ מִפָּנֶֽיךָ׃

כִּֽי־עָ֭שִׂיתָ מִשְׁפָּטִ֣י וֺדִינִ֑י יָשַׁ֥בְתָּ לֺ֝כִסֵּ֗א שׁוֹפֵ֥ט צֶֽדֶק׃

גָּעַ֣רְתָּ ג֭וֹיִם אִבַּ֣דְתָּ רָשָׁ֑ע שֺׁמָ֥ם מָ֝חִ֗יתָ לֺעוֹלָ֥ם וָעֶֽד׃

הָֽאוֹיֵ֨ב ׀ תַּ֥מּוּ חֳרָב֗וֹת לָ֫נֶ֥צַח וֺעָרִ֥ים נָתַ֑שְׁתָּ אָבַ֖ד זִכְרָ֣ם הֵֽמָּה׃

וַֽ֭יהוה לֺעוֹלָ֣ם יֵשֵׁ֑ב כּוֹנֵ֖ן לַמִּשְׁפָּ֣ט כִּסְאֽוֹ׃

וֺה֗וּא יִשְׁפֹּֽט־תֵּבֵ֥ל בֺּצֶ֑דֶק יָדִ֥ין לֺ֝אֻמִּ֗ים בֺּמֵישָׁרִֽים׃

וִ֘יהִ֤י יהו֣ה מִשְׂגָּ֣ב לַדָּ֑ךְ מִ֝שְׂגָּ֗ב לֺעִתּ֥וֹת בַּצָּרָֽה׃

וֺיִבְטֺח֣וּ בֺ֭ךָ יוֹדֺעֵ֣י שֺׁמֶ֑ךָ כִּ֤י לֹֽא־עָזַ֖בְתָּ דֹרֺשֶׁ֣יךָ יהוֽה׃

זַמֺּר֗וּ לַ֭יהוה יֹשֵׁ֣ב צִיּ֑וֹן הַגִּ֥ידוּ בָ֝עַמִּ֗ים עֲלִֽילוֹתָֽיו׃

כִּֽי־דֹרֵ֣שׁ דָּ֭מִים אוֹתָ֣ם זָכָ֑ר לֹֽא־שָׁ֝כַ֗ח צַעֲקַ֥ת עֲנָוִֽים׃

חׇֽנְנֵ֬נִי יהו֗ה רֺאֵ֣ה עׇ֭נְיִי מִשֹּׂנֺאָ֑י מֺ֝רוֹמֺמִ֗י מִשַּׁ֥עֲרֵי־מָֽוֶת׃

לֺמַ֥עַן אֲסַפֺּרָ֗ה כָּֽל־תֺּהִלָּ֫תֶ֥יךָ בֺּשַֽׁעֲרֵ֥י בַת־צִיּ֑וֹן אָ֝גִ֗ילָה בִּישׁוּעָתֶֽךָ׃

טָבֺע֣וּ ג֭וֹיִם בֺּשַׁ֣חַת עָשׂ֑וּ בֺּרֶֽשֶׁת־ז֥וּ טָ֝מָ֗נוּ נִלְכֺּדָ֥ה רַגְלָֽם׃

נ֤וֹדַ֨ע ׀ יהוה֮ מִשְׁפָּ֪ט עָ֫שָׂ֥ה בֺּפֹ֣עַל כַּ֭פָּיו נוֹקֵ֣שׁ רָשָׁ֑ע הִגָּי֥וֹן סֶֽלָה׃

יָשׁ֣וּבוּ רֺשָׁעִ֣ים לִשְׁא֑וֹלָה כׇּל־גּ֝וֹיִ֗ם שֺׁכֵחֵ֥י אֱלֹהִֽים׃

כִּ֤י לֹ֣א לָ֭נֶצַח יִשָּׁכַ֣ח אֶבְי֑וֹן תִּקְוַ֥ת עֲ֝נִיִּ֗ים תֹּאבַ֥ד לָעַֽד׃

קוּמָ֣ה י֭הוה אַל־יָעֹ֣ז אֱנ֑וֹשׁ יִשָּׁפֺט֥וּ ג֝וֹיִ֗ם עַל־פָּנֶֽיךָ׃

שִׁ֘יתָ֤ה יהו֨ה ׀ מוֹרָ֗ה לָ֫הֶ֥ם יֵדֺע֥וּ גוֹיִ֑ם אֱנ֖וֹשׁ הֵ֣מָּה סֶּֽלָה׃