תהלים פרק קמה

זה המזמור כולו הודאה וסיפור סדרי הנהגתו במציאות. והוא מחובר על סדר אל"ף-בי"ת, אלא שחסר אות הנו"ן. לא ידענו הסיבה לפי הפשט.

תֺּהִלָּ֗ה לֺדָ֫וִ֥ד אֲרוֹמִמְךָ֣ אֱלוֹהַ֣י הַמֶּ֑לֶךְ וַאֲבָרֲכָ֥ה שִׁ֝מְךָ֗ לֺעוֹלָ֥ם וָעֶֽד׃

בֺּכׇל־י֥וֹם אֲבָרֲכֶ֑ךָּ וַאֲהַלֺלָ֥ה שִׁ֝מְךָ֗ לֺעוֹלָ֥ם וָעֶֽד׃

גָּ֘ד֤וֹל יהו֣ה וּמֺהֻלָּ֣ל מֺאֹ֑ד וֺ֝לִגְדֻלָּת֗וֹ אֵ֣ין חֵֽקֶר׃

דּ֣וֹר לֺ֭דוֹר יֺשַׁבַּ֣ח מַעֲשֶׂ֑יךָ וּגֺב֖וּרֹתֶ֣יךָ יַגִּֽידוּ׃

הֲ֭דַר כֺּב֣וֹד הוֹדֶ֑ךָ וֺדִבְרֵ֖י נִפְלֺאֹתֶ֣יךָ אָשִֽׂיחָה׃

וֶעֱז֣וּז נוֹרֺאֹתֶ֣יךָ יֹאמֵ֑רוּ וּגְדוּלָּתֺךָ֥ אֲסַפֺּרֶֽנָּה׃

זֵ֣כֶר רַב־טוּבֺךָ֣ יַבִּ֑יעוּ וֺצִדְקָתֺךָ֥ יֺרַנֵּֽנוּ׃

חַנּ֣וּן וֺרַח֣וּם יהו֑ה אֶ֥רֶךְ אַ֝פַּ֗יִם וּגֺדׇל־חָֽסֶד׃

טוֹב־יהו֥ה לַכֹּ֑ל וֺ֝רַחֲמָ֗יו עַל־כׇּל־מַעֲשָֽׂיו׃

יוֹד֣וּךָ י֭הוה כׇּל־מַעֲשֶׂ֑יךָ וַ֝חֲסִידֶ֗יךָ יֺבָרֲכֽוּכָה׃

כֺּב֣וֹד מַלְכוּתֺךָ֣ יֹאמֵ֑רוּ וּגֺבוּרָתֺךָ֥ יֺדַבֵּֽרוּ׃

לֺהוֹדִ֤יעַ ׀ לִבְנֵ֣י הָ֭אָדָם גֺּבוּרֹתָ֑יו וּ֝כְב֗וֹד הֲדַ֣ר מַלְכוּתֽוֹ׃

מַֽלְכוּתֺךָ֗ מַלְכ֥וּת כׇּל־עֹֽלָמִ֑ים וּ֝מֶֽמְשֶׁלְתֺּךָ֗ בֺּכׇל־דּ֥וֹר וָדֹֽר׃

סוֹמֵ֣ךְ י֭הוה לֺכׇל־הַנֹּפֺלִ֑ים וֺ֝זוֹקֵ֗ף לֺכׇל־הַכֺּפוּפִֽים׃

עֵֽינֵי־כֹ֭ל אֵלֶ֣יךָ יֺשַׂבֵּ֑רוּ וֺאַתָּ֤ה נֽוֹתֵן־לָהֶ֖ם אֶת־אׇכְלָ֣ם בֺּעִתּֽוֹ׃

פּוֹתֵ֥חַ אֶת־יָדֶ֑ךָ וּמַשְׂבִּ֖יעַ לֺכׇל־חַ֣י רָצֽוֹן׃

צַדִּ֣יק י֭הוה בֺּכׇל־דֺּרָכָ֑יו וֺ֝חָסִ֗יד בֺּכׇל־מַעֲשָֽׂיו׃

קָר֣וֹב י֭הוה לֺכׇל־קֹרֺאָ֑יו לֺכֹ֤ל אֲשֶׁ֖ר יִקְרָאֻ֣הוּ בֶאֱמֶֽת׃

רֺצוֹן־יֺרֵאָ֥יו יַעֲשֶׂ֑ה וֺֽאֶת־שַׁוְעָתָ֥ם יִ֝שְׁמַ֗ע וֺיוֹשִׁיעֵֽם׃

שׁוֹמֵ֣ר י֭הוה אֶת־כׇּל־אֹהֲבָ֑יו וֺאֵ֖ת כׇּל־הָרֺשָׁעִ֣ים יַשְׁמִֽיד׃

תֺּהִלַּ֥ת יהו֗ה יֺֽדַבֶּ֫ר־פִּ֥י וִיבָרֵ֣ךְ כׇּל־בָּ֭שָׂר שֵׁ֥ם קׇדְשׁ֗וֹ לֺעוֹלָ֥ם וָעֶֽד׃