תהלים פרק ג
רבותינו עליהם השלום שאלו (ברכות ז, ב): "מזמור לדוד? – 'בכיה' מיבעי ליה (=צריך היה לומר)!"... ומכל מקום, לפי הפשט, לא חל עליהם שם 'מזמור' בשעת מעשה, אלא אחר שניצל היה מחבר שירתו, עד שאסף את כולם וקבעם לשיר לבית המקדש.
מִזְמ֥וֹר לֺדָוִ֑ד בֺּ֝בׇרֺח֗וֹ מִפֺּנֵ֤י ׀ אַבְשָׁל֬וֹם בֺּנֽוֹ׃
י֭הוה מָֽה־רַבּ֣וּ צָרָ֑י רַ֝בִּ֗ים קָמִ֥ים עָלָֽי׃
רַבִּים֮ אֹמֺרִ֪ים לֺנַ֫פְשִׁ֥י אֵ֤ין יֺֽשׁוּעָ֓תָה לּ֬וֹ בֵֽאלֹהִ֬ים סֶֽלָה׃
וֺאַתָּ֣ה י֭הוה מָגֵ֣ן בַּעֲדִ֑י כֺּ֝בוֹדִ֗י וּמֵרִ֥ים רֹאשִֽׁי׃
ק֭וֹלִי אֶל־יהו֣ה אֶקְרָ֑א וַיַּֽעֲנֵ֨נִי מֵהַ֖ר קׇדְשׁ֣וֹ סֶֽלָה׃
אֲנִ֥י שָׁכַ֗בְתִּי וָֽאִ֫ישָׁ֥נָה הֱקִיצ֑וֹתִי כִּ֖י יהו֣ה יִסְמֺכֵֽנִי׃
לֹֽא־אִ֭ירָא מֵרִבֺב֥וֹת עָ֑ם אֲשֶׁ֥ר סָ֝בִ֗יב שָׁ֣תוּ עָלָֽי׃
ק֘וּמָ֤ה יהו֨ה ׀ הוֹשִׁ֘יעֵ֤נִי אֱלֹהַ֗י כִּֽי־הִכִּ֣יתָ אֶת־כׇּל־אֹיֺבַ֣י לֶ֑חִי שִׁנֵּ֖י רֺשָׁעִ֣ים שִׁבַּֽרְתָּ׃
לַיהו֥ה הַיְשׁוּעָ֑ה עַֽל־עַמֺּךָ֖ בִרְכָתֶ֣ךָ סֶּֽלָה׃
עוד תהלים באתר: ספר תהלים כל הפרקים · תהלים יומי · תהלים בציבור