תהלים פרק לט
הכוונה בו כעניין מזמור שלפניו: תשובה על העוונות ותפילה על חוליו ושאר צרותיו, והזכרת האויבים, המלעיגים עליו. ובדרש פירשוהו (שוחר טוב לט, א) על הגלות והגזרות הגדולות שיסבלו בו העם הנבחר. והכול נאות לעניין כדרך המזמור שלפניו, לפי לשון המפרש ושפע דיבורו.
לַמְנַצֵּ֥חַ לִֽידוּת֗וּן מִזְמ֥וֹר לֺדָוִֽד׃
אָמַ֗רְתִּי אֶֽשְׁמְרָ֣ה דֺרָכַי֮ מֵחֲט֪וֹא בִלְשׁ֫וֹנִ֥י אֶשְׁמְרָ֥ה־לֺפִ֥י מַחְס֑וֹם בֺּעֹ֖ד רָשָׁ֣ע לֺנֶגְדִּֽי׃
נֶאֱלַ֣מְתִּי ד֭וּמִיָּה הֶחֱשֵׁ֣יתִי מִטּ֑וֹב וּכְאֵבִ֥י נֶעְכָּֽר׃
חַם־לִבִּ֨י ׀ בֺּקִרְבִּ֗י בַּהֲגִיגִ֥י תִבְעַר־אֵ֑שׁ דִּ֝בַּ֗רְתִּי בִּלְשֽׁוֹנִי׃
הוֹדִ֘יעֵ֤נִי יהו֨ה ׀ קִצִּ֗י וּמִדַּ֣ת יָמַ֣י מַה־הִ֑יא אֵ֝דֺעָ֗ה מֶה־חָדֵ֥ל אָֽנִי׃
הִנֵּ֤ה טֺפָח֨וֹת ׀ נָ֘תַ֤תָּה יָמַ֗י וֺחֶלְדִּ֣י כֺאַ֣יִן נֶגְדֶּ֑ךָ אַ֥ךְ כׇּֽל־הֶ֥בֶל כׇּל־אָ֝דָ֗ם נִצָּ֥ב סֶֽלָה׃
אַךְ־בֺּצֶ֤לֶם ׀ יִֽתְהַלֶּךְ־אִ֗ישׁ אַךְ־הֶ֥בֶל יֶהֱמָי֑וּן יִ֝צְבֹּ֗ר וֺֽלֹא־יֵדַ֥ע מִי־אֹסֺפָֽם׃
וֺעַתָּ֣ה מַה־קִּוִּ֣יתִי אֲדֹנָ֑י תּ֝וֹחַלְתִּ֗י לֺךָ֣ הִֽיא׃
מִכׇּל־פֺּשָׁעַ֥י הַצִּילֵ֑נִי חֶרְפַּ֥ת נָ֝בָ֗ל אַל־תֺּשִׂימֵֽנִי׃
נֶ֭אֱלַמְתִּי לֹ֣א אֶפְתַּח־פִּ֑י כִּ֖י אַתָּ֣ה עָשִֽׂיתָ׃
הָסֵ֣ר מֵעָלַ֣י נִגְעֶ֑ךָ מִתִּגְרַ֥ת יָ֝דֺךָ֗ אֲנִ֣י כָלִֽיתִי׃
בֺּֽתוֹכָ֘ח֤וֹת עַל־עָוֹ֨ן ׀ יִסַּ֬רְתָּ אִ֗ישׁ וַתֶּ֣מֶס כָּעָ֣שׁ חֲמוּד֑וֹ אַ֤ךְ הֶ֖בֶל כׇּל־אָדָ֣ם סֶֽלָה׃
שִֽׁמְעָ֥ה־תֺפִלָּתִ֨י ׀ יהו֡ה וֺשַׁוְעָתִ֨י ׀ הַאֲזִינָה֮ אֶֽל־דִּמְעָתִ֗י אַֽל־תֶּ֫חֱרַ֥שׁ כִּ֤י גֵ֣ר אָנֹכִ֣י עִמָּ֑ךְ תּ֝וֹשָׁ֗ב כֺּכׇל־אֲבוֹתָֽי׃
הָשַׁ֣ע מִמֶּ֣נִּי וֺאַבְלִ֑יגָה בֺּטֶ֖רֶם אֵלֵ֣ךְ וֺאֵינֶֽנִּי׃
עוד תהלים באתר: ספר תהלים כל הפרקים · תהלים יומי · תהלים בציבור