תהלים פרק ז
עניין המזמור התבאר בתוכו, שהיה על ענייני כוש בן ימיני. ונראה, שהיה אויב לו ומצר לו הרבה. ורבותינו פירשו (מועד קטן טז, ב) שעל שאול אמרֹו, וכן נראה. ומפני שהטיח דברים כנגדו ביותר מדי, לא רצה לפרסם לכתוב שמו בהדיא, כעניין "גם במדעך מלך אל תקלל" (קהלת י, כ).
שִׁגָּי֗וֹן לֺדָ֫וִ֥ד אֲשֶׁר־שָׁ֥ר לַיהו֑ה עַל־דִּבְרֵי־כ֝֗וּשׁ בֶּן־יֺמִינִֽי׃
יהו֣ה אֱ֭לֹהַי בֺּךָ֣ חָסִ֑יתִי הוֹשִׁיעֵ֥נִי מִכׇּל־רֹ֝דֺפַ֗י וֺהַצִּילֵֽנִי׃
פֶּן־יִטְרֹ֣ף כֺּאַרְיֵ֣ה נַפְשִׁ֑י פֹּ֝רֵ֗ק וֺאֵ֣ין מַצִּֽיל׃
יהו֣ה אֱ֭לֹהַי אִם־עָשִׂ֣יתִי זֹ֑את אִֽם־יֶשׁ־עָ֥וֶל בֺּכַפָּֽי׃
אִם־גָּ֭מַלְתִּי שֽׁוֹלֺמִ֥י רָ֑ע וָאֲחַלֺּצָ֖ה צוֹרֺרִ֣י רֵיקָֽם׃
יִֽרַדֹּ֥ף אוֹיֵ֨ב ׀ נַפְשִׁ֡י וֺיַשֵּׂ֗ג וֺיִרְמֹ֣ס לָאָ֣רֶץ חַיָּ֑י וּכְבוֹדִ֓י ׀ לֶעָפָ֖ר יַשְׁכֵּ֣ן סֶֽלָה׃
ק֘וּמָ֤ה יהו֨ה ׀ בֺּאַפֶּ֗ךָ הִ֭נָּשֵׂא בֺּעַבְר֣וֹת צוֹרֺרָ֑י וֺע֥וּרָה אֵ֝לַ֗י מִשְׁפָּ֥ט צִוִּֽיתָ׃
וַעֲדַ֣ת לֺ֭אֻמִּים תֺּסוֹבֺבֶ֑ךָּ וֺ֝עָלֶ֗יהָ לַמָּר֥וֹם שֽׁוּבָה׃
יהוה֮ יָדִ֪ין עַ֫מִּ֥ים שׇׁפְטֵ֥נִי יהו֑ה כֺּצִדְקִ֖י וּכֺתֻמִּ֣י עָלָֽי׃
יִגְמׇר־נָ֬א רַ֨ע ׀ רֺשָׁעִים֮ וּתֺכוֹנֵ֪ן צַ֫דִּ֥יק וּבֹחֵ֣ן לִ֭בּ֗וֹת וּכְלָי֗וֹת אֱלֹהִ֥ים צַדִּֽיק׃
מָֽגִנִּ֥י עַל־אֱלֹהִ֑ים מ֝וֹשִׁ֗יעַ יִשְׁרֵי־לֵֽב׃
אֱ֭לֹהִים שׁוֹפֵ֣ט צַדִּ֑יק וֺ֝אֵ֗ל זֹעֵ֥ם בֺּכׇל־יֽוֹם׃
אִם־לֹ֣א יָ֭שׁוּב חַרְבּ֣וֹ יִלְט֑וֹשׁ קַשְׁתּ֥וֹ דָ֝רַ֗ךְ וַֽיְכוֹנֺנֶֽהָ׃
וֺ֭לוֹ הֵכִ֣ין כֺּלֵי־מָ֑וֶת חִ֝צָּ֗יו לֺֽדֹלֺקִ֥ים יִפְעָֽל׃
הִנֵּ֥ה יֺחַבֶּל־אָ֑וֶן וֺהָרָ֥ה עָ֝מָ֗ל וֺיָ֣לַד שָֽׁקֶר׃
בּ֣וֹר כָּ֭רָֽה וַֽיַּחְפֺּרֵ֑הוּ וַ֝יִּפֹּ֗ל בֺּשַׁ֣חַת יִפְעָֽל׃
יָשׁ֣וּב עֲמָל֣וֹ בֺרֹאשׁ֑וֹ וֺעַ֥ל קׇ֝דְקֳד֗וֹ חֲמָס֥וֹ יֵרֵֽד׃
אוֹדֶ֣ה יהו֣ה כֺּצִדְק֑וֹ וַ֝אֲזַמֺּרָ֗ה שֵֽׁם־יהו֥ה עֶלְיֽוֹן׃
עוד תהלים באתר: ספר תהלים כל הפרקים · תהלים יומי · תהלים בציבור